Fréttasafn

Verkefninu sem hlaut styrk úr Uppbyggingasjóði Norðurlands eystra 2022 var formlega hleypt af stokkunum í maí.

Albertína Friðbjörg Elíasdóttir hefur verið ráðin framkvæmdastjóri SSNE. Hún tekur við starfinu af Eyþóri Björnssyni sem senn tekur við starfi forstjóra Norðurorku. Albertína er með BA próf í félagsfræði frá Háskóla Íslands og MSc próf í landafræði frá sama skóla. Hún var þingmaður Norðausturkjördæmis á árabilinu 2017-2021. Hún var einnig framkvæmdastjóri Eims, þróunar- og nýsköpunardeildar Norðurlands eystra á sviði sjálfbærni, grænnar orku og bættrar auðlindanýtingar. Albertína hefur starfað hjá samtökum sveitarfélaga á Vestfjörðum og verið þar einnig formaður fjórðungssambands Vestfjarða sem Atvinnuþróunarfélag svæðisins féll undir. Á árabilinu 2014-2016 var Albertína verkefnastjóri atvinnumála hjá Akureyrarbæ. Starf framkvæmdastjóra SSNE var auglýst þann 28.apríl og bárust 24 umsóknir um starfið, þar af drógu 5 umsókn sína til baka. Ráðningaferlið var unnið í samstarfi við ráðningaþjónustu Mögnum á Akureyri.

Smári Jónas Lúðvíksson situr nú sinn fyrsta fund í Loftlagsráði en hann er nýskipaður fulltrúi Sambands íslenskra sveitarfélaga.

Málþing Veltek í Menningarhúsinu Hofi, Akureyri, 24. júní Samþætting heilbrigðis- og velferðarþjónustu, sjálfbær þjónusta, sjálfstæðir notendur. Heilbrigðis- og velferðartækniklasi Norðurlands (Veltek) mun halda málþing um nýjar nálganir í þjónustu við íbúa. Flutt verða m.a. erindi um stafræn umskipti innan heilbrigðis- og velferðarþjónustu í dreifðum byggðum, samvinnu á norðurslóðum og rannsóknir á þjónustulausnum kynntar. Í tengslum við málþingið munu fyrirtæki kynna þjónustulausnir sínar. Aðgangur að þinginu er öllum opinn en óskað er eftir skráningu hér DAGSKRÁ 9:00 – 9:30 Húsið opnar, boðið upp léttar veitingar á morgunverðarhlaðborði. 9:30 – 9:45 Opnun og kynning Veltek heilbrigðis- og velferðartækniklasa Norðurlands. Perla Björk Egilsdóttir, verkefnastjóri Veltek. Rafrænt ávarp heilbrigðisráðherra. 9:45 – 10:10 Stafræn umskipti og samþætting á heilbrigðis- og félagsþjónustu á strjálbýlum svæðum. Kynning á norrænum verkefnum. 10:10 – 10:25 Norðurslóðasamfélög, áskoranir og tækifæri til samvinnu. Embla Eir Oddsdóttir, forstöðumaður Norðurslóðanets. 10:30 – 11:05 Hlé með kaffiveitingum. Fyrirtæki sýna heilbrigðislausnir sínar. 11:05 – 11:30 Tækifæri til samvinnu og nýsköpunar. Garðar Már Birgisson, viðskiptaþróun hjá Þulu. 11:30 – 11:55 Velferðartækni og sjálfstæð búseta. Dr. Björg S. Anna Þórðardóttir, iðjuþjálfi, gestalektor við Heilbrigðisvísindasvið Háskólans á Akureyri og rannsóknarstaða við Osló Metropolitan Háskólann. 12:00 – 13:10 Hádegishlé. Boðið verður upp á léttan hádegisverð og fyrirtæki sýna heilbrigðislausnir sínar. 13:10 – 13:30 Dagþjálfun á Heilsuvernd Hjúkrunarheimili. Þóra Sif Sigurðardóttir, framkvæmdastjóri hjúkrunar hjá Heilsuvernd Hjúkrunarheimili. 13:30 – 13:50 Nýjungar í velferðartækni hjá heimahjúkrun HSN á Akureyri. Deborah Júlía Robinson, ráðgjöf iðjuþjálfa við heimahjúkrun HSN og Eva Björg Guðmundsdóttir, yfirhjúkrunarfræðingur við heimahjúkrun HSN. 13:50 – 14:15 Heilbrigðisfræðsla og virkir notendur heilbrigðisþjónustu. Dr. Brynja Ingadóttir, sérfræðingur í hjúkrun og forstöðumaður Miðstöðvar um sjúklingafræðslu á Landspítala. 14:15 – 14:40 Nýsköpunar- og þróunarverkefni í öldrunarþjónustu Fjallabyggðar. Helga G. Erlingsdóttir, verkefnastjóri Fjallabyggð. 14:40 Samantekt. Sigurður E. Sigurðsson, framkvæmdastjóri lækninga Sjúkrahúsinu á Akureyri og stjórnarmaður Veltek. 14:50 Undirritun samstarfsyfirlýsingar á milli Fjallabyggðar, HSN og Veltek. 15:00 Boðið verður upp á léttar veitingar í þinglok og fyrirtæki sýna heilbrigðislausnir sínar.

Eitt af áhersluverkefnum SSNE 2022 er Lærisneið, þar sem þróa á frekar valgreinar þvert á fámenna skóla. Á síðasta skólaári fékk Ásgarður veglegan styrk frá SSNE til þess að þróa kennslu í Skóla í skýjunum sem nýttist meðal annars í að útbúa miðlægt tvær valgreinar, önnur var tölvuleikjahönnun með Unity og hin var bókagerð. Nemendur úr níu skólum í þremur hópum komu saman á netinu yfir heila önn. Tilraunin heppnaðist vel og saman lærðum við, skólastjórnendur og kennarar mjög margt um nauðsynlegan aðbúnað og stuðning til þess að betur mætti fara næst. Í samráði við skólastjórnendur nú í fjórtán skólum var ákveðið að gefa nemendum kost á að koma með tillögur að valgreinum og taka þátt í forvalskönnun þar sem við þrengdum hugmyndir þeirra úr 40 valgreinahugmyndum og niður í nítján. Nú hafa allir 160 nemendurnir valið og að öllum líkindum munum við geta boðið upp á allt að fjórtán valgreinarnar þar sem 95% af nemendum fá sitt fyrsta val. Við erum í skýjunum! Kökuskreytingar, íþróttaval, eðlis- og efnafræðival, kvikmyndagerð, franska, þýska, hljóðblöndun, kynjafræði, rafíþróttir, tölvuleikjahönnun og leiklist - svo eitthvað sé nefnt. Nemendur blandast greinilega inn í hópana og sem dæmi má nefna að krakkar úr fjórum ólíkum skólum velja sér eðlis- og efnafræði, eitthvað sem mjög erfitt hefði verið að sinna inni í hverjum skóla fyrir sig og er erfitt að sinna í fjölmennari skólum líka. Starfsfólk Ásgarðs og Skóla í skýjunum munu í sumar sjá um að setja námskeiðin upp í Valgreinaskólanum á Námsgagnatorginu. Kennarar koma úr þátttökuskólunum og eru ráðnir utan að ef að ekki næst að manna innan skólanna. Greiðslur og framlög skólanna fara í samlagspott sem verið er að móta. „Ég þori að fullyrða að allir sem hafa komið að verkefninu hingað til eru að springa úr spenningi. Hér erum við í sameiningu að vinna að mjög mikilvægum byggðaverkefnum sem eru í raun svo mikilvæg að við efumst ekki um að áhrifin verða veruleg. Ef nemendur í fámennum skólum geta fengið reglubundin aðgang að valgreinum við hæfi og sérhæfðri ráðgjöf og þjónustu í gegnum netið - þá erum við að auka fjölbreytni, efla tengslanet nemenda, nýta sérþekkingu kennara þvert á sveitarfélög, auka stærðarhagkvæmni, styrkja og efla gæðastarf í grunnskólum og rjúfa félagslega einangrun“. Kristrún Lind Birgisdóttir, eigandi og framkvæmdastjóri Ásgarðs Samstarfsaðilar verkefnisins eru: Hríseyjarskóli, Stórutjarnaskóli, Þingeyjarskóli, Reykjahlíðarskóli, Öxarfjarðarskóli, Grunnskóli Raufarhafnar, Skóli í skýjunum og Þórshafnarskóli. Að auki hafa eftirfarandi skólum boðið að vera með: Reykhólaskóli, Patreksskóli, Bíldudalsskóli, Tálknafjarðarskóli, Grunnskóli Bolungarvíkur og Grunnskóli Strandabyggðar.

Tilkynnt var um fjórðu úthlutun úr Barnamenningarsjóði Íslands og hlutu 34 verkefni styrki upp á 92 m.kr. Þar af voru 5 af Norðurlandi eystra sem hlutu samtals 4,7 m.kr.

Fréttir og fróðleikur um uppbyggingu Norðurlands eystra og störf SSNE á vormánuðum 2022.