Krubbur er tveggja daga hugmyndasmiðja þar sem unnið er að lausnum sem tengjast betri nýtingu auðlinda og lágmörkun úrgangs. Viðburðurinn verður haldinn á Húsavík dagana 8.-9. mars og er fyrir öll áhugasöm á aldrinum 16 ára og eldri. Vegleg verðlaun eru fyrir bestu hugmyndirnar og heildarverðmæti vinninga er um 1.000.000 kr.

Í Krubbi verður unnið í teymum þar sem þátttakendur deila þekkingu og reynslu og vinna saman að því að útfæra lausnir við áskorunum sem fyrirtæki á svæðinu kynna. Með þessum nýsköpunarviðburði er markmiðið

--> að efla skapandi hugsun,
--> frumkvöðlastarf á sama tíma og
--> unnið er að markmiðum hringrásarhagkerfisins.

Teymin fá ráðgjöf frá sérhæfðum leiðbeinendum sem aðstoða þau við að útfæra hugmyndirnar. Engin þörf er á sérþekkingu þátttakenda, heldur einungis skapandi og lausnamiðaðri hugsun. Tillögurnar verða að lokum kynntar fyrir dómnefnd sem velur fjögur sigurvegarateymi.

 Á Húsavík hefur mikil uppbygging átt sér stað í nýsköpunargeiranum undanfarið. Hraðið miðstöð nýsköpunar opnaði árið 2022 en þar er aðstaða í boði fyrir frumkvöðla og öll þau sem vilja nýta sér vinnuaðstöðu í skapandi og vel tækjum búnu umhverfi. Á meðan á hugmyndasmiðjunni stendur verður hægt að nýta aðstöðu í stafrænni smiðju, fá sértilboð í gistingu og einnig verða fjölmargir skemmtilegir viðburðir í gangi s.s. miðnæturopnun í Sjóböðunum, Pubquiz á Húsavík Öl, leiksýning hjá Leikfélagi Húsavíkur o.fl.

Skráðu þig til leiks hér: https://www.hic.is/krubbur 
og fylgstu með á facebook viðburði Krubss hugmyndahraðhlaups.

Hugmyndahraðhlaupið dregur nafn sitt af Krubbi og svokölluðu Krubbsveðri sem skapast í ákveðinni vindátt á Húsavík. Veðrinu fylgir svo mikill stormur að fólk heldur sig innan dyra meðan hann geysar. Vonast er eftir alvöru Krubbsstormi í hugum þátttakenda meðan á hlaupinu stendur!

Krubbur er unninn í góðu samstarfi fjölda aðila, meðal annars SSNE, Hraðsins, Norðanáttar, Eims, KLAK, PCC, Háskóla Íslands, Háskólans á Akureyri, Háskólans á Hólum, Íslenska gámafélagsins, Ocean Missions og Norðurþings.

Viðburðurinn er meðal annars styrktur af Lóu nýsköpunarsjóði en Klak Icelandic Startups sér um framkvæmd viðburðarins.

Nánari upplýsingar og skráningarform er á www.hic.is/krubbur, þar má líka finna upplýsingar um tilboð á gistingu. Spennandi helgi á Húsavík framundan.

Á meðal nýtanlegra hliðarafurða í Norðurþingi sem safnast á hverju ári eru þessir hér sem sjá má á myndinni fyrir neðan. Hvernig getum við aukið líftíma auðlinda jarðar og komi í veg fyrir að efni og hlutir hverfi úr hagkerfinu sem úrgangur?