Háskólar, stofnanir og fyrirtæki sem sækja um styrki í alþjóðlega rannsóknasjóði geta sótt um Sóknarstyrki. Forgangur er veittur umsóknum í Horizon Europe rannsókna- og nýsköpunaráætlun ESB og norræn samfjámögnunarverkefni, t.d. NordForsk.
Styrkir eru eingöngu greiddir inn á bankareikinga íslenskra stofnana eða lögaðila og umsækjandi um Sóknarstyrk þarf að gegna starfi við bókhaldsstofnun umsóknar.
Til hvers?
Að styrkja íslenska lögaðila í að undirbúa sókn í alþjóðlega rannsóknasjóði og samstarfsáætlanir sem Ísland er aðili að.
Umsóknarfrestur
Opið er fyrir umsóknir allt árið.
Sótt er um í gegnum mínar síður Rannís.
Hvert er markmiðið?
Að styðja sókn íslenskra háskóla, stofnana og fyrirtækja í alþjóðlega rannsóknasjóði og samstarfsáætlanir sem Ísland greiðir þátttökugjald í.
Stjórnir Rannsóknasjóðs og Tækniþróunarsjóðs leggja til fjármagn til að styrkja vinnu við umsóknagerð.
Styrktegund
- Ferðastyrkur
Ferðastyrkur miðast við fargjald á almennu farrými auk dagpeninga samkvæmt reglum Stjórnarráðsins um ferðakostnað opinberra starfsmanna.
Hámarksstyrkur er 300.000 kr. - Umsóknastyrkur 1
Styrkur vegna þátttöku íslenskra aðila (participants) í vinnu við skrif á umsókn í alþjóða rannsóknasjóði og samstarfsáætlanir.
Hámarksstyrkur er 500.000 kr. - Umsóknastyrkur 2
Styrkur vegna verkefnisstjórnar (coordination) íslenskra aðila við skrif á umsókn í alþjóða rannsóknasjóði og samstarfsáætlanir.
Hámarksstyrkur er 1.000.000 kr.
Styrkhæfir aðilar eru þeir sem tilgreindir eru sem þátttakendur (participants) og/eða verkefnisstjóri (coordinator) á umsókn sem send hefur verið í alþjóðlegan rannsóknasjóð eða samstarfsáætlun.
Ef um er að ræða fleiri en einn íslenskan þátttakanda í verkefni skal sá aðili sem er tengiliður við verkefnisstjóra sækja um Sóknarstyrkinn.
Hægt er að sækja um eingöngu ferðastyrk eða umsóknastyrk eða hvort tveggja umsóknastyrk og ferðastyrk.
Umsóknarferli Sóknarstyrkja
Sótt er um Sóknarstyrki eftir að umsókn hefur verið send í alþjóðlegan rannsóknasjóða eða samstarfsáætlun.
Eingöngu er tekið við umsóknum í gegnum rafrænt umsóknakerfi sjóðsins.
Skila þarf inn afriti af umsókn og staðfestingu á móttöku umsóknar frá viðkomandi sjóði.
Úthlutunarreglur
Engin ein stofnun getur fengið úthlutað meira en 10% af heildar úthlutunarfé sjóðsins. Skólar innan stærri stofnana eins og Háskóla Íslands eru skilgreindir sem stofnun. Ef upphæð innsendra umsókna er hærri en fjárveiting sjóðsins er dreifing styrkja á milli stofnana tekin til greina.
