Stjórn Tækniþróunarsjóðs hefur samþykkt að bjóða fulltrúum 72 verkefna, sem sóttu um í sjóðinn á vormisseri, að ganga til samninga um nýja styrki.

Í boði voru styrktarflokkarnir Hagnýt rannsóknaverkefni, Fræ, Sproti, Vöxtur og Markaðsstyrkur. Alls bárust 459 umsóknir og er árangurshlutfall styrktra verkefna sem hlutfall af innsendum umsóknum 16%. Haft verður samband við verkefnastjóra þessara verkefna og þeir boðaðir til samningafundar.

Í þessari úthlutun eru styrkveitingar til nýrra verkefna 897 milljónir króna á þessu ári en þar sem verkefnin eru til allt að þriggja ára nemur heildarkostnaður vegna þeirra 1.755 milljónum króna. Þetta er stærsta einstaka úthlutun Tækniþróunarsjóðs frá upphafi. Síðustu ár hafa fjárframlög til sjóðsins verið um 2,3 milljarðar króna en í samræmi við stefnu Vísinda- og tækniráðs sem samþykkt var á síðasta ári voru fjárveitingar til sjóðsins hækkaðar í 3,6 milljarða á árinu 2021.

Næsti umsóknafrestur um fyrirtækjastyrki verður 15. september 2021 og verður úthlutun vegna þeirra tilkynnt undir lok ársins. Opið er allt árið fyrir umsóknir í styrktarflokknum Fræ og Einkaleyfastyrkir.

Hlutverk Tækniþróunarsjóðs er að styðja við rannsóknir og þróunarstarf sem miða að nýsköpun í íslensku atvinnulífi en hann er opinn fyrir nýsköpunarverkefnum úr öllum atvinnugreinum. Sjóðurinn er samkeppnissjóður sem býður upp á fjölmarga styrktarflokka fyrir verkefni á mismunandi stað í vaxtarferli fyrirtækja.

Alls voru 5 verkefni á Norðurlandi eystra  (af 72) sem er boðið til samninga við sjóðinn að þessu sinni en þau eru:

• Snoðbreiða: verðlítil ull verður verðmæt
• Fiskvinnsla - Næsta kynslóð
• NordPlast
• Ylur: Hátæknigróðurhús á Norðurlandi
• Ný meðferð við arfgengri íslenskri heilablæðingu

Við óskum styrkþegum innilega til hamingju með árangurinn. 

Heildarlistinn 2021*:

* Listinn er birtur með fyrirvara um hugsanlegar villur