Verkefnisstjórar Brothættra byggða og sambærilegra byggðaþróunarverkefna komu saman til fundar í húsakynnum Byggðastofnunar dagana 12. og 13. okt. sl. Ánægjulegt var að hópurinn gat loksins hist á staðfundi eftir langan tíma eftir takmarkanir vegna COVID-19. Dagskráin var þéttskipuð. Farið var yfir verkefnislýsingu Brothættra byggða og ýmis praktísk málefni tengd framkvæmd og umsýslu verkefna í þátttökubyggðarlögunum. Aðalsteinn Þorsteinsson forstjóri Byggðastofnunar kynnti hlutverk og starfsemi Byggðastofnunar. Fundargestum gafst færi á að kynnast nánar lánamöguleikum Byggðastofnunar, ýmissi þróunarvinnu á sviði byggðamála s.s. þróun mælaborða um byggðatengd málefni og aðgerðaáætlun byggðaáætlunar stjórnvalda.

Dr. Hólmfríður Sveinsdóttir hélt áhugavert erindi sem hún nefndi Tækifæri byggðanna. Í erindi sínu kom Hólmfríður inn á margvísleg málefni tengd frumkvöðlastarfi og mikilvægi breiðs samstarfs. Góðar umræður sköpuðust um erindi Hólmfríðar, þá sérstaklega um verkefni tengd nýsköpun í sjávarútvegi og vaxandi fiskeldi. Fundurinn var jafnframt nýttur til jafningafræðslu og skoðanaskipta um áskoranir í smærri byggðarlögum og til umræðu um leiðir til aðgerða. Áhersla var lögð á umræðu um nauðsyn þess að íbúar og sveitarfélög taki höndum saman um að skapa og nýta þau sóknarfæri sem efla bæði atvinnu- og mannlíf í smærri byggðarlögum um land allt.

Byggðastofnun