Sóknaráætlanasamningar við átta landshlutasamtök sveitarfélaga til fimm ára voru undirritaðir í gær. Eyjólfur Ármannsson, samgöngu- og sveitarstjórnarráðherra, Logi Einarsson, menningar-, nýsköpunar- og háskólaráðherra, Jóhann Páll Jóhannsson, umhverfis-, orku- og loftslagsráðherra og fulltrúar landshlutasamtakanna undirrituðu samningana í Norræna húsinu. Framlög ríkisins til samninganna árið 2025 nema samtals 865,7 milljónum króna og framlög sveitarfélaga samtals 93,9 milljónum króna.

Samningarnir byggja á sveitarstjórnarlögum og gilda til fimm ára, 2025-2029. Markmið með samningunum er að stuðla að jákvæðri og sjálfbærri byggðaþróun, treysta stoðir menningar, eflingu nýsköpunar og atvinnulífs og þannig auka samkeppnishæfni landshluta og þar með landsins alls. Þá er markmiðið einnig að efla samráð hjá stjórnvöldum og milli landshluta og tryggja gagnsæi við úthlutun opinberra fjármuna.

Sóknaráætlanir landshluta eru stefnumótandi áætlanir sem fela í sér stöðumat viðkomandi landshluta, framtíðarsýn, markmið og aðgerðir til að ná þeim markmiðum. Markmiðið er að ráðstöfun fjármuna sem varið er til verkefna í einstökum landshlutum á sviði samfélags-, umhverfis- og byggðamála byggi á áherslum heimafólks.

Í máli ráðherranna kom fram mikil tiltrú á þá hugmyndafræði sem Sóknaráætlanir landshlutanna byggja á og eins metnaður til að halda áfram að byggja áfram á þeim árangri sem náðst hefur með fyrri sóknaráætlunum. 

Árið 2025 er framlag ríkisins til samninganna samtals 865,7 m.kr., þar af 552,1 m.kr. frá innviðaráðuneytinu, 223,6 m.kr. frá háskóla-, iðnaðar- og nýsköpunarráðuneytinu og 90 m.kr. frá umhverfis-, orku- og loftslagsráðuneytinu. Þá leggja sveitarfélögin samningnum samtals til um 94 m.kr. á árinu 2025. Heimilt er að semja um framlög annarra aðila að samningnum.

Forsögu sóknaráætlana má rekja allt aftur til ársins 2011 þegar hugmyndafræðin var fyrst mótuð og sett fram í stefnuyfirlýsingunni Ísland 2020 og voru fyrstu samningar um sóknaráætlanir landshluta voru gerðir árið 2013. Verklag sóknaráætlana hefur reynst vel og almenn ánægja er með það, bæði meðal ríkis og sveitarfélaga.