^{Þórir Örn Jónsson, Sædís Ágústsdóttir og börn fá mynd með forsetahjónum.}

Forseti og forsetafrú fóru í opinbera heimsókn í Langanesbyggð sem lauk með íbúafundi á Bakkafirði þar sem þau fengu kynningu á verkefninu Betri Bakkafjörður. Þá komu þau við í Skeggjastaðakirkju, sem er elsta timburkirkja á Austurlandi byggð 1845, og hjá Djúpalæk, þar sem Bakkfirðingar hafa reist minnisvarða til heiðurs Kristjáni Einarssyni skáldi frá Djúpalæk.

Bakkfirðingar tóku vel á móti forsetahjónunum með trakteringum og færðu fjölskyldunni á Bessastöðum bók að gjöf um litlu músina hana Pílu Pínu, til minningar um Kristján frá Djúpalæk og framlag hans í þágu barnamenningar á Íslandi. Mikið var skrafað, bæði um áskoranir í hinum dreifbýlli landshlutum, en ekki síður um tækifærin, s.s. þau sem felast í menningartengdri ferðaþjónusta og margt fleira.

^{Frú Eliza Reid, Guðni Th. Jóhannesson, forseti Ísland og Gunnar Már Gunnarsson, verkefnisstjóri Betri Bakkafjarðar}

Forsetahjónin nutu svo kyrrðarinnar við Bakkaflóa en förinni var heitið til Vopnafjarðar í dag.